|
Referendum başladı

Şotlandiyada Birləşmiş Krallığını taleyini həll edəcək referendum səsverməsi artıq başlayıb.

ANS PRESS-in məlumatına görə, referendum ölkənin Böyük Britaniyadan 307 illik asılılığına son qoyulub-qoyulmayacağını müəyyənləşdirəcək. 2608 seçki məntəqəsi yerli vaxtla səhər saat 7-də açılıb və axşam saat 10-da bağlanacaq.

Seçicilər "Şotlandiya müstəqil ölkə olmalıdırmı?" sualına "Bəli" yaxud "Xeyr" cavabını seçməli olacaqlar.

Seçkilərdə iştirak üçün yaşı 16-dan yuxarı şotlandların 97%-i - başqa sözlə, 4,2 milyon seçici qeydiyyatdan keçib. Bu isə seçici fəallığının yüksək olacağını ehtimal etməyə əsas verir.

Referendumun nəticələrinin Şotlandiyanın 32 inzibati rayonunun hamısında səslər hesablandıqdan sonra sabah səhər saatlarında açıqlanacağı gözlənilir. Əgər "Bəli" xanasının işarələndiyi bülletenlərin sayı çox olarsa, Şotlandiya 1707-ci ildə İngiltərə ilə alyans yaradılmasından bəri davam edən müstəqillik arzusunu reallaşdıra biləcək.