Ukrayna Baş Prokurorluğunun müstəntiqləri Donbasdan olan milyarder Rinat Axmetovu dindirir.
Virtualaz.org saytı xəbər verir ki, bu haqda “Ukrainskaya pravda” öz mənbələrinə istinadən məlumat verib.
Qəzetin yazdığına görə, Axmetov yanvarın 22-də prokurorluğa çağrılıb və dindirmə 6 saat davam edib. Onun terrorçuluğun və qanunsuz silahlı dəstələrin maliyyələşdirilməsi işi üzrə dindirildiyi xəbər verilir.
Məlumata görə, Axmetovun adı bu işdə şahid qismində keçir. Həmin cinayət işində “Ukrayna-irəli” partiyasının lideri Natalya Korolevskayanın və Regionlar Partiyasının liderlərindən Aleksandr Yefremovun adı fiqurantlar qismində yer alır.
Rinat Axmetov Ukraynanın ən varlı adamlarından biridir. “Forbes”in hesablamalarına görə, onun 11,2 milyard dollar sərvəti var.
R.Axmetov Regionlar Partiyasının əsas sponsoru hesab edilirdi. Yanukoviçin devrilməsindən sonra o, indiki hakimiyyətə qarşı açıq müxalifətə keçməsə də ölkənin şərqində separatçılara dəstək verdiyinə dair çoxsaylı ittihamlarla üzləşib.
