|
Trampın inauqurasiyasına Azərbaycandan kimlər gedəcək?
ABŞ-ın yeni prezidenti Donald Trampın inauqurasiya mərasiminə iki həftə qaldı. Yanvarın 20-də D.Tramp and içəcək və yanvarın 21-dən ABŞ prezidenti vəzifəsini həyata keçirməyə başlayacaq. Artıq Trampın inauqurasiya həftəsinin proqramı açıqlanıb. İnauqurasiya komitəsinin yaydığı məlumata görə, mərasimin rəsmi hissəsi yanvarın 19-da səhər saatlarında başlayacaq. 

Əvvəlcə Tramp və vitse-prezident Arlinqton məzarlığına gedərək çələng qoyacaq. Bunun ardınca Linkoln memorialının qarşısında konsert proqramı olacaq.
Yanvarın 20-də prezident və vitse-prezident Konqresdə and içəcək və ardınca Ağ Evə qədər davam edəcək inauqurasiya paradında iştirak edəcəklər.

Mərasimə son dərəcə ciddi təhlükəsizlik hazırlıqları da aparıldığı bildirilir. İnauqurasiya mərasiminə xarici ölkələrdən kimlərin dəvət edildiyi, kimlərin qatılacağı barədə isə hələlik rəsmi məlumat verilmir. ABŞ-ın Azərbaycandakı səfirliyi də Azərbaycandan kimlərəsə dəvət olub-olmadığı barədə hələlik açıqlama vermir. Səfirlik əməkdaşı Mehdi Hüseynquliyev “Yeni Müsavat”ın bu barədə sorğusuna yaxınlarda cavab veriləcəyini bildirib.
 
Azərbaycanın Xarici İşlər Nazirliyi və digər müvafiq rəsmi dövlət orqanları da ABŞ prezidentinin inauqurasiya mərasiminə dəvət olub-olmadığı, kimin qatılacağı barədə hər hansı məlumat verməyiblər. 
 
Xatırladaq ki, 2013-cü ilin yanvarında Barak Obamanın inauqurasiya mərasimində ölkəmizi Azərbaycanın ABŞ-dakı səfiri təmsil etmişdi. 
 
Ekspertlər isə hesab edir ki, ABŞ bu dəfə də səfirlə kifayətlənsə və Bakıya xüsusi dəvət göndərməsə belə, Azərbaycan iqtidarı üçün Tramp hakimiyyəti ilə işləmək çətin olmayacaq. Azərbaycan hakimiyyətinə əvvəlki dönəmlərdə də Respublikaçılarla işləmək Demokratlarla işləməkdən daha rahat olub. Yeni seçilmiş prezident Trampla da işləmək ən azından Obama administrasiyası ilə işləməkdən daha asan olacaq. 

Bu fikirdə olan politoloqlar diqqəti daha çox yeni dövlət katibinin üzərinə cəmləyirlər. Donald Trampın xarici siyasətini "ExxonMobil" neft şirkətinin artıq sabiq sədri Reks Tillerson dövlət katibi olaraq yürüdəcək və təbii ki, onun da Azərbaycanla əlaqəsi olub, ölkəmizdə bir çox insanları şəxsən tanıyır. Bu şəxsi tanışlıq da münasibətlərin qurulmasında müəyyən rol oynayacaq. Trampın özü də Azərbaycanla tanışdır və burada biznes maraqları olub. Prezident seçiləndən sonra da Azərbaycan prezidenti ilə telefonla danışıb. Bu da Azərbaycanın müstəqillik tarixində bir ilkdir.
 
Ekspertlər qeyd edirlər ki, bütün bunlara rəğmən demək olmaz ki, Tramp və onun iqtidarı bütün məsələlərdə Azərbaycan iqtidarının yanında olacaqlar və heç bir tənqid səsləndirməyəcəklər. ABŞ-da hökumət idarəçiliyi əsrlərin ənənəsinə əsaslanır və hər qurumun öz işi var. Heç kim də onlara fərdi və kollektiv təzyiq göstərmək iqtidarında deyil. Bu baxımdan, ABŞ-ın demokratik təsisatları, o cümlədən ABŞ Dövlət Departamenti əvvəlki qaydada Azərbaycanda monitorinqlərini davam etdirəcək və hesabatlarını açıqlayacaq. Bu hesabatlarda tənqid də olacaq.