Misirdə “quş qripi” virusundan daha bir nəfər ölüb.
ANS PRESS-in məlumatına görə, Misirin əl-Minya şəhərində “quş qripi” (H5N1) virusuna yaxalanan 26 yaşlı bir nəfər dünyasını dəyişib. Bu barədə Misirin səhiyyə nazirliyindən bildirilib.
Açıqlamada, bu ölümlə Misirdə xəstəliyin ortaya çıxdığı 2006-cı il tarixindən bəri ölənlərin sayının 70-ə yüksəldiyi yazılıb.
Qeyd edək ki, "Quş qripi" bütün növ ev quşları, vəhşi quşları, o cümlədən sinantrop quşları (sərçə, sığırçın, göyərçin və s.) yoluxdurur. Xəstəliyin əsas yayılma mənbəyi əsasən xəstəliyə tutulmuş quşlardır. Quş virusu ilə yoluxmuş quşlar aerogen, ağız suyu, kal kütləsi və digər ifrazatlarla virusu xarici mühitə yayırlar. Xəstəlik hava axını, insanlar, nəqliyyat, milçək, böcək və ölü quşlar vasitəsilə yoluxur. Quşların birbaşa mövcud əlaqələri ilkin yoluxmanın ən geniş yayılan qoludur.
