Bakı Ali Neft Məktəbində (BANM) “Tələbələrin təhlükəsizliyi diqqət mərkəzində” adlı təlim kursu keçirilib.
Məktəbdən daxil olan məlumata görə, tədbirdə Fövqəladə Hallar nazirinin müavini Etibar Mirzəyev, SOCAR-ın vitse-prezidenti Xalik Məmmədov və FHN-nin Bakı Regional Mərkəzinin rəisi Kənan Aşurlu iştirak ediblər.
Tədbirin nəzəri hissəsini giriş nitqi ilə açan rektor Elmar Qasımov iştirakçıları salamlayaraq bildirib ki, təhlükəli hadisələr zamanı necə davranılmasında, hansı tədbirlərin görülməsinin öyrənilməsində və tədris saatlarında qəfildən baş verə biləcək hər hansı fövqəladə hadisə zamanı mühafizə və təhlükəsizlik qaydaları haqqında məlumatlı olmağın əhəmiyyəti böyükdür.
Tədbirin praktik hissəsi zamanı FHN-nin qurumları, Bakı şəhər təyinatlı digər xidmət və təşkilatların qüvvə və vasitələri, eləcə də BANM-nin müəllim və tələbələrinin iştirakı ilə, FHN qurumlarının fövqəladə hadisələr zamanı istifadə olunan xüsusi xilasetmə texnikası, alət və avadanlıqları təlimlərə cəlb olunaraq, taktiki-xüsusi təlim həyata keçirilib.

Cia.az
