|
Daha bir miqrant faciəsi:

Avropaya getmək üçün yola çıxan miqrantlar yenə də faciə ilə üzləşib. Yunanıstan sahillərində içində miqrantlar olan qayıq aşıb.

Nəticədə azı 28 nəfər həlak olub. Qayıqda olan 68 nəfəri xilas etmək mümkün olub, 29 nəfər isə özləri sudan çıxa bilib.

Miqrantların hansı ölkədən olduğu hələ məlum deyil. Qayıq Yunanıstanın Farmakonisi adası yaxınlığında batıb. Hazırda həmin ərazidə axtarış-xilasetmə işləri aparılır.

2015-ci ilin əvvəlindən Avropa İttifaqı ölkələri ərazisinə 500 min miqrant gəlib. Onların çoxu Suriyada, İraqda, Liviyada və digər Yaxın Şərq ölkələrindəki müharibədən yaxa qurtarmaq üçün qaçanlardır. Qaçqınlar Avropaya əsasən dəniz yolu ilə gəlir. Onlara bu işdə yardım göstərən "işbazlar" var. Hər qaçqının Avropaya çatması 700-1500 avroya başa gəlir. Lakin bu kimi faciələr də baş verir. İndiyə qədər yüzlərlə miqran gəmi qəzaları nəticəsində, yaxud yük maşınlarında havasızlıqdan ölüb.

Avropa Komissiyası bəyan edib ki, hazırda müşahiudə olunan miqrant böhranı II dünya müharibəsindən sonra bütün dünyada qeydə alınmış ən böyük böhrandır.

Beynəlxalq Miqrasiya Təşkilatın hesabatında deyilir ki, Aralıq dənizi vasitəsi ilə Avropa üz tutan miqrantların sayı 350 min nəfəri keçib. Onlar daha çox Yunanıstan, İtaliya, İspaniya və Maltada məskən salırlar.

Cia.az