Regional elektron xəritə və naviqator “GoMap elektron xəritə” xidməti" "Bakı 2015" birinci Avropa Oyunları üçün yeni servislər təqdim edib.
Cia.az-ın məlumatına görə, Mədəniyyət və Turizm Nazirliyinin dəstəyi ilə yaradılmış "GoMap.Az"da ilk Avropa Oyunlarının keçirildiyi bütün idman obyektləri xüsusi qeyd edilib və həmin obyektlərə getmək üçün avtobus marşrutlarının xətləri göstərilib.
Nazirlikdən bildirilib ki, yeni servislər azərbaycanlı idmansevərlərə və şəhərimizin qonaqlarına idman obyektlərinə getmək üçün daha rahat şərait yaradır. Həmçinin, Avropa Oyunları münasibətilə Bakının xəritəsi ilə işləyən, ödənişsiz "Yollar" offlayn naviqatoru yaradılıb. Bu proqramı mobil qurğuya yükləyən hər bir istifadəçi proqramdan internetə çıxış olmadan da rahat istifadə edə bilər.
İnternet bağlantısı olarsa, həm də yollardakı trafik vəziyyətini də izləmək olar. Həmçinin daha geniş funksionallı, Azərbaycan, Gürcüstan və Türkiyənin xəritəsi ilə işləyən "YollarPro" offlayn naviqator proqramı da "GoMap.Az" xəritəsinin əsasında yaradılıb. Yeni servislərdən biri də Bakı şəhərində trafik haqqında məlumatın xəritə üzərində əks etdirilməsidir. İndi hər bir "GoMap.Az" istifadəçisi Azərbaycanın yollarında olan trafik vəziyyəti ilə tanış ola bilər.
Cia.az
