|
Yanan bina daha bir problem yaradıb

Binəqədi rayonu, Azadlıq prospektindəki 16 mərtəbəli binada mayın 19-da baş verən və 15 nəfərin ölümü ilə nəticələnən yanğından sonra bina yararsız hala düşdü.

Buna görə də binanın təmir olunub istifadəyə tam yararlı hala gətirilməsi üçün Nazirlər Kabineti tərəfindən 3 milyon manat vəsait ayrıldı.

Təmir zamanı isə bina qarşısındakı yolla hərəkət edən piyadaların təhlükəsizliyi nəzərə alınmır.

Tikinti gedən ərazidə qoruyucu çətir çəkilməyib.

Bina ərazisinə kənar şəxslərin girişinə mane olan taxta lövhələr vurulub. Səkidə dayanan polis əməkdaşları piyadaların binadan xeyli kənarda getməsinə nəzarət edir. Amma yuxarıdan düşə biləcək hər hansı tikinti materialından, əşyadan qorunmaq üçün xüsusi örtük yoxdur.

Bir sözlə, binanın qarşısındakı səki ilə getmək mümkün deyil, daha doğrusu, təhlükəlidir. Vəziyyəti ağırlaşdıran başqa bir problem isə odur ki, səkinin o biri tərəfi maşın yoludur. Yəni burada piyadaların keçib getməsi üçün faktiki olaraq heç bir imkan yoxdur.

Binanın tikintisi “Azəraqrartikinti” ASC-yə həvalə olunub.

Məsələyə aydınlıq gətirmək üçün ASC-nin rəhbəri Ağalar Vəliyevlə əlaqə saxlamağa çalışsaq da suallarımıza cavab ala bilmədik.

(virtualorg.az)