|
3 yaşlı Fərəhin anasının -

Baş vermiş yanğında dünyasını dəyişən 3 yaşlı Fərəhin anası Günay Məhərrəmovanın ölüm xəbəri yalan çıxıb. 
1 saylı şəhər Kliniki Tibbi Mərkəzi Toksikologiya şöbəsinin müdiri Azər Maqsudov açıqlamasında faciə nəticəsində ağır xəsarət alan G.Məhərrəmovanın pulmonoloqlar tərəfindən yoxlanılacağını deyib. 
2 gün öncə Binəqədi rayonunda 15 nəfərin ölümü, 50 nəfərin xəsarət alması ilə nəticələnən yanğın faciəsindən sonra 12 nəfərin Kliniki Tibbi Mərkəzə köçürüldüyünü deyən Azər Maqsudov bildirib ki, 1 nəfər bu gün evə buraxılacaq: 

“Hazırda 5 nəfərin vəziyyəti ağır olaraq qalır. 1983-cü il təvəllüdlü Səbinə Manafova isə bu gün evə buraxılacaq. Digər xəstələr isə bu gün pulmonoloqlar tərəfindən yoxlanılacaq və müalicənin sonrakı gedişi müəyyənləşdiriləcək. Yanğında dünyasını dəyişən 3 yaşlı Fərəhin anası Günay Məhərrəmovanın vəziyyəti də hələ ki, stabil olaraq qalır”. 

Qeyd edək ki, bu gün səhər saatlarında “İnstagram”da Günay Məhərrəmovanın vəfat etdiyi barədə yalan məlumatlar yerləşdirilib. Bu məsələyə münasibət bildirən Azər Maqsudov deyib ki, insanlar belə vəziyyətlərdə hərəkətlərinə diqqət etməlidirlər: 

“Burada yatan xəstələr haqqında neqativ fikir söyləməklə onlara daha çox zərbə vurarlar. Bu da onların müalicəsinə yaxşı təsir etməz. Ona görə diqqətli olmaq lazımdır”.

Cia.az