Hər bir dövlət və cəmiyyət üçün müharibədə iştirak edən şəxslərin müharibədən sonrakı mövcud durumu , sosial- psixoloji vəziyyəti önəmlidir. Ölkəmizdə son 30 ildə olduğu kimi, vətən müharibəsindən sonra da Azərbaycanın müstəqilliyi, torpaqlarımızın bütövlüyü uğrunda əzalarını qurban vermiş, yaşamlarına fiziki qüsurla davam edən qazilərə diqqət və qayğı yüksək səviyyədədir. Prezident İlham Əliyev Birinci vitse-prezident Mehriban Əliyevanın müvafiq göstərişlərinə əsasən qazilərimiz və Vətən müharibəsi iştirakçıları üçün lazımi şərait yaradılır. Prezidentimizin müharibə əlillərinə mərhəməti , qayğısı qazilərimizə sevinc bəxş etməklə yanaşı, təqdirəlayiqhal kimi qiymətləndirilir. Əlil qazilərimizə qayğı dövlət siyasətinin əsas prioritetidir. Qazilərə göstərilən qayğı nümunəvi xarakter daşıyır.
Hər bir insan sağlam yaşamaq istəyir, lakin bu təbii istəkdən ömürlük məhrum edilən, fiziki imkanları məhdud olan qazilərimizin amputant futbol klubu öz istedad və bacarıqlarını nümayiş etdirməsi üçün meydandır.
Fiziki qüsurlarına baxmayaraq, bacarıqlarına arxalananlar əsl idmançı kimi yaşayır, ölkədaxilində və xaricdə keçirilən yarışlarda ölkəmizi qürurla təmsil edirlər. Çünki onlar qalib ölkənin qürurlu vətəndaşları, düşməni diz çökdürən qəhrəman türk oğullarıdır.
Qarabağ- Əlil Döyüşçülər federasiyanın yaranması da qazilərə göstərilən qayğının , diqqətin bariz nümunəsidir. Sağlamlıqlarını torpaq uğrunda itirən əlil və qazilərimiz üçün amputant futbol klubu bir növ reablitasiya xarakteri daşıyır.
Ötən il yaranan “Qarabağ qaziləri” amputant futbol klubunun təşəbbüskarı Azərbaycan Respublikası Şəhid, Əlil və Veteranlar birliyinin təsisçisi, Qarabağ qazisi Rövşən Akif oğlu Quliyevdir. Qeyrətli Vətən oğlu Rövşən müəllim Qarabağ Əlil Döyüşçülər Futbol Federasiyasının təsisçisi və prezidentidir.
Müharibədə vətəni fiziki gücü, iradəsi , torpağa, vətənə olan sevgisi ilə müdafiə edən Rövşən Quliyev müharibədən sonra da öz fəaliyyətini vətənə , vətəndaşlara olan məhrəm, ilıq hissləri, sevgisi ilə davam etdirir. Heç bir təmənna, maddi maraq güdmədən, müharibədə yaralanmış, fiziki və psixi travma almış qazilər üçün futbol klubu təsis edir. Qarabağ- Əlil Döyüşçülər Futbol Federasiyası İctimai Birliyi adından da bəlli olduğu kimi, Qarabağ, Vətən uğrunda döyüşmüş , sağlamlıqlarını Azərbaycanın bütövlüyü, suverenliyi uğrunda fəda etmiş qəhrəman oğullarımızdan ibarətdir. Qazilərimizdən ibarət olan bu idman (QƏDFF) futbol federasiyası 27.12.2018- cil il tarixdə 1118-G65-3652 saylı qeydiyyat nömrəsi ilə Azərbaycan Respublikası Ədliyyə Nazirliyi tərəfindən dövlət qeydiyyatına alınıb. Federasiyanın tərkibində 7 klub və yığma milli Komanda fəaliyyət göstərir. Bakı- Nərimanov , Abşeron, Gəncə, Balakən , Kəpəz, Tovuz, Qazax və “ Qarabağ” yığma milli komandası . Ümumilikdə futbol federasiyasının oyunçuları və idarə heyyəti daxil olmaqla , hal-hazırda 72 üzvdən ibarətdir. Qeyd: bir ayağını itirmiş şəxslər oyunçu, bir qolunu itirmiş şəxslər qapıçı kimi federasiyada fəaliyyət göstərir.
Rövşən Quliyevin klubu yaratmaqda əsas məqsədi müharibədə əlil olmuş qazilərin cəmiyyətə inteqrasiyasının təmin olunması, Qarabağ həqiqətlərinin Əlil olmuş qazilərin simasında dünya arenasında nümayiş olunmasıdır.Federasiya qısa müddətdi fəaliyyətə başlasa da, artıq bir çox uğurlara imza atıb. Beynəlxalq Yoldaşlıq yarışlarında iştirak edən Milli Komandamız üçrəngli bayrağımızı xarici ölkələrdə dalğalandırmış, tək ayaqları üstündə Azərbaycan himninin sədaları altında Vətən sevgisini nümayiş etdirməyi bacarmış, uğurlu nəticələrlə Azərbaycanımıza dönmüşlər. Nəzərinizə çatdırım ki, federasiya Avropa Dünya futbol assosiasiyasının üzvü seçilmişdir. Hətta Avropa futbol Federasiyasının prezident seçkisində səsvermə hüququ qazanmışdır.
Əlil vətəndaşlara qayğının gücləndirilməsi siyasətinə uyğun olaraq, Rövşən Quliyev yaxın gələcəkdə Amputant Futbol Akademiyasının açılması və hər yaş qrupunda qüsurlu uşaq və yeniyetmələrin futbola cəlb olunması və onların tərkibində Milli Komandanın yaradılmasını, Bakıda və bölgələrdə Avropa Amputant Futbol standartlarına uyğun olaraq Futbol Stadion , Reablitasiya mərkəzlərinin tikilməsinə nail olmaq, müxtəlif vəziyyətdə əlil olmuş şəxsləri cəlb etmək, uşaqlar və gənclər üçün Amputant futbol düşərgələrinin yaradılmasını planlaşdırır.
Fiziki qüsurlu insanlara şərait yaratmaq üçün ilk öncə onların psixologiyasına bələd olmaq lazımdır. Onların dünyasını tanımadan onlara kömək etmək çox çətindir. Rövşən Quliyev fiziki qüsurlu qazilərimizin, vətəndaşların cəmiyyətdən kənarda qalmaması üçün var gücü ilə səy göstərir.
Elida Muxayeva
Cia.az