İndoneziya hökuməti koronavirus pandemiyasına görə sosial məhdudiyyətlərin müddətini avqustun 10-dan 16-dək uzadıb.
AZƏRTAC xəbər verir ki, bu barədə İndoneziyanın dəniz işləri və investisiyalar naziri Luhut Binsar Pancaitan bu gün keçirilən mətbuat konfransı zamanı məlumat verib.
Xatırladaq ki, hökumət orqanları məhdudiyyətlərin müddətini iyulun 3-dən avqustun 9-dək müəyyən etmişdi. Həmin məhdudiyyətlər işə məsafədən cəlb edilməni, virusun daha çox yayıldığı rayonlarda işgüzar fəallığa qadağaları və ölkə daxilində hərəkət zamanı vaksinasiya sertifikatının mövcudluğunu tələb edir.
Qeyd edək ki, son sutkalar ərzində İndoneziyada 20,7 min nəfərdə koronavirus aşkar edilib, onlardan 1475-i həyatını itirib. Ümumilikdə pandemiya dövründə bu ölkədə 3,6 milyon yoluxma halının qeydə alındığı, onlardan 108 mindən çoxunun həyatını itirdiyi bildirilir. Təqribən 3,1 milyon nəfərin isə sağaldığı qeyd edilir.
Son məlumatlara görə, ölkə əhalisinin təqribən 8,9 faizi peyvənd olunub. Vaksinin ilk dozasını isə 18,7 faiz sakin alıb.
