|
Qüdrət Həsənquliyev: “Bəzən görürsən ki, 2 ay ərzində yaranan şirkət milyonluq tenderi udur”

Milli Məclisin bu gün (21 may) keçirilən plenar iclasında deputat Qüdrət Həsənquliyev “Dövlət satınalmaları haqqında” qanun layihəsinin müzakirəsi zamanı çıxış edərkən narahatlıqlarını ifadə edib.
Musavat.com-un məlumatına görə deputat bildirib ki, bu dəyişikliklərlə beynəlxalq reytinqimiz güclənəcəksə, bu, müsbət haldır: “Çünki bu həm də ölkəyə investisiya qoyulması baxımından əhəmiyyətlidir”.

Deputat deyib ki, Azərbaycanda dövlət satınalmaları ilə bağlı problemlər var: “Birincisi, tenderlərdə mallar istehsalçıdan deyil, vasitəçidən alınır. Həmin mallar da fərqli qiymətə rəsmiləşdirilir.

Bu, hər kəsin bildiyi məsələdir və cəmiyyətdə narazılıq doğurur. İkinci problem tenderlərdə iştirakla bağlıdır. Bəzən görürsən ki, 2 ay ərzində yaranan şirkət milyonluq tenderi udur. Məncə bu, qanunvericiliklə tənzimlənməlidir. Tenderlərdə iştirak edən şirkətlər ən azı 5 il öz fəaliyyətində fəaliyyət göstərməlidir”.

Millət vəkili çıxışı zamanı sual da edib: “Əsas problem haradan qaynaqlanır? Biz o məsələyə yaxınlaşmırıq. Məncə, problemin kökü buradadır. Bu iki problemin aradan qaldırılması haqqında düşünməliyik”.