Ermənistan mediası Azərbaycan ilə Pakistan arasında hərbi aviasiya sahəsində əməkdaşlığın inkişaf etdirilməsi məsələlərindən yazıb.
Xəbərdə Azərbaycan Respublikası Müdafiə nazirinin müavini, Hərbi Hava Qüvvələrinin Komandanı, general-leytenant Ramiz Tahirovun yanvarın 11-də Azərbaycanda səfərdə olan Pakistan İslam Respublikasının Hərbi Hava Qüvvələrinin komandanı, aviasiya marşalı Mujahid Ənvər Xan ilə danışıqlar aparmasından bəhs olunub.
Bildirilib ki, tərəflər hərbi hava qüvvələrinin birgə təlimlərinin keçirilməsinə dair razılığa gəliblər:
"Azərbaycan və Pakistan hərbi sahədə fəal əməkdaşlıq edirlər. Uzun illərdir ki, mətbuatda Azərbaycanın Pakistandan JF-17 “Thunder” qırıcı təyyarələri satın alması barədə məlumatlar dərc olunur. Bundan əlavə, Azərbaycan Pakistandan “Super Mushshak” təlim təyyarəsi alıb".
