Hindistanın cənubunda yerləşən Eluru şəhərinin bir sakini naməlum xəstəlikdən vəfat edib, daha 315 nəfər eyni xəstəliyin əlamətləri ilə xəstəxanaya yerləşdirilib.
Musavat.com xəbər verir ki, bu barədə Hindistan mətbuatı yazıb.
Naməlum xəstəlik əlamətləri olan sakinlər 5 dekabrdan xəstəxanalara qəbul olunmağa başlayıblar. Son məlumatlara görə, onların sayı 46-sı uşaq olmaqla 315-ə çatıb.
Həkimlərin sözlərinə görə, xəstələrdə huşunu itirmə, başgicəllənmə, baş ağrısı və epilepsiya simptomları müşahidə olunur. Onların koronavirus testləri mənfi olub.
Yerli səhiyyə işçiləri xəstələrdən analiz üçün su, qida və qan nümunələri götürərək laboratoriyaya göndəriblər. Onlar havanın çirklənməsi və ya keyfiyyətsiz məhsulların istifadəsi nəticəsində kütləvi bir infeksiyanın yayıldığını istisna etmirlər.
