Təqvimdə bu mərhələni Avropadakı yarışlar əvəzləyəcək
Avqustun 10-dan etibarən ölkə ərazisində açıq havada idman yarışları və oyunlarının keçirilməsinə icazə verilib. Bəs “Formula-1" yarışlarının da keçirilməsinə icazə verilə bilərmi? Qeyd edək ki, “Formula-1” yarışları hər il Azərbaycanda iyun ayının əvvəllərində keçirilirdi. Koronavirus pandemiyası ortaya çıxmazdan əvvəl bu ildə ”Formula-1"in Bakıda 5-7 iyun tarixində keçiriləcəyi açıqlanmışdı. Lakin sonra pandemiya ilə əlaqədar olaraq yarışların tarixinin sentyabrın 19-20-nə keçirildiyi haqda məlumat yayılmışdı.
Məsələ ilə bağlı “Bakı Şəhər Halqası” ilə əlaqə saxlamağa çalışdıq. Qurumun İctimaiyyətlə Əlaqələr Departamentinin meneceri Gülnaz Quliyeva “Yeni Müsavat”a açıqlama verib: “Bu il Azərbaycanda ”Formula-1" yarışları keçirilməyəcək. Yarışların gələn il keçiriləcəyi planlaşdırılır".
Xatırladaq ki, “Formula 1” şirkəti 2020 mövsümündə koronavirus pandemiyası ilə əlaqədar yaranan vəziyyətə görə ABŞ, Meksika və Braziliyada da Qran-pri keçirməkdən imtina edib. Bundan əlavə, Kanada Qran-prisinin də keçirilməsi sual altındadır. Təqvimdə bu mərhələləri Avropadakı yarışlar əvəzləyəcək.
