|
“Möcüzələrə inanıram” –

Xalq artisti Murad Dadaşov koronavirusla mübarizə aparan həmkarı Bəhram Bağırzadə haqqında danışıb.

Xalq artisti “Planet Parni iz Baku”nun instaqram səhifəsinə görüntülü bağlanaraq həmkarının sağalacağına inandığını deyib: “Bəhramın canının ağrısı ilə maraqlanan hər kəsə təşəkkür edirəm. Xalq və cəmiyyət üçün Bəhram Bağırzadə fərqli bir insandır. Onun səhhəti ilə bağlı xəbər hamımızı məyus etdi. Vəziyyət hamını şoka salıb. Bəhramı hamı sevir. İnsanlar onun səhhəti barədə bizdən xəbər gözləyir. Susanda şayiələrin yayılmasına səbəb yaradırıq. Aydındır ki, ailəsinin vəziyyəti çox ağırdır. Bəhramın yaşlı anası, övladları, xanımı və bacısı var".

Murad Dadaşov bildirib ki, nə isə yazanda ilk növbədə onları nəzərə almaq lazımdır:"Biz hamımız çox gərginik və məsələ çox çətindir. Bu bəla millət, yaş, cins, sərhəd tanımır. İstənilən qapını döyə bilər. Bu hadisə “koronavirus yoxdur” deyənlərə cavabdır. Bəhramın enerjisi onun sağalmasına bəs edər. Açıq deyim, proqnoz və s. kimi şeylərə yox, möcüzələrə inanıram. İnsanın həyatı boyu etdiyi yaxşılıqlar ən çətin məqamlarda qarşısına çıxır. Ümid edək ki, Allah Bəhramı bizim üçün qoruyacaq”.