ABŞ-ın “Xəstəliklərə Nəzarət və Önləmə Mərkəzləri”nin direktoru Robert Redfeld ölkədə yeni tip koronavirus epidemiyasının ikinci dalğasının daha ağır ola biləcəyini deyib.
“Vaşinqton Post” qəzetinə danışan Redfeld qeyd edib: “Gələn qış mövsümündə koronavirusun yenidən yayılması indi yaşadığımız vəziyyətdən daha ağır nəticələrə gətirib çıxara bilər”.
Bununla da ABŞ-ın səlahiyyətli orqanlarına xəbərdarlıq edən Redfeld indidən koronavirusun ikinci dalğasının baş verməsi ehtimalı ilə bağlı hazırlıqlara başlanılmasına çağırış edib.
Onun sözlərinə görə, qeyd olunan ehtimal baş verərsə, ABŞ-ın səhiyyə sistemi “ağlagəlməz bir yük” altına düşəcək.
Xatırladaq ki, ABŞ-da koronavirusa yoluxanların sayı 819 min 321 nəfərə çatıb, 45 min 355 nəfər isə dünyasını dəyişib.
