| Xəbər 2306 dəfə oxunub
Elinanın intiharı işi -

Məktəbli Elinanın ölümünə görə məktəb direktorunun müavini və icra başçısının müavini də məsuliyyətə cəlb edilməsi istənilir.

Səbail rayonu 162 nömrəli tam orta məktəbin 8-ci sinif şagirdi, 2004-cü il təvəllüdlü Elina Hacıyevanın ölümü ilə bağlı yenidən məhkəməyə müraciət edilib.

Mərhumun anası və nümayəndələri məktəbin tərbiyə işləri üzrə direktor müavini Lalə Məhərrəmova və 1 saylı Kliniki Tibbi Mərkəzin həkimləri barəsində cinayət işinin başlanması ilə bağlı Bakı şəhər Prokurorluğuna müraciət ediblər. İstintaq zamanı Bakı şəhər Prokurorluğunda həmin şəxslərlə bağlı cinayət işi açılmayıb.

Nümayəndələrin Bakı şəhər Prokurorluğu tərəfindən verilən qərardan məhkəməyə şikayət ediblər. Həmin şikayət üzrə məhkəmə Səbail rayon Məhkəməsində hakim Anar Tanrıverdiyevin icraatına verilib. Məhkəmə şikayəti təmin etməyib.

Mərhumun anası və nümayəndələri qərardan Bakı Apellyasiya Məhkəməsinə şikayət verib. Məhkəmə şikayəti təmin etməyib.

Xatırladaq ki, Səbail Rayon Məhkəməsinin hökmü ilə Elinanın təhsil aldığı məktəbin direktoru olmuş Sevinc Abbasova barəsində 2 il 2 ay 14 gün azadlığın məhdudlaşdırılması ilə bağlı hökm çıxarılıb. S.Abbasova bu müddət ərzində elektorn qolbaqla gəzməli olacaq.

Hökmdə mülki iddia hissəsində S.Abbasovadan 18 min manat tutularaq Elinanın anasına ödənilməsi də göstərilib.

Rəsmi ittihamda qeyd olunur ki, Elina Hacıyeva mütəmadi olaraq dərslərə gecikib, geyimi məktəbli formasına uyğun olmayıb.

O da qeyd edilir ki, Elina sonuncu hadisədən öncə bir dəfə məktəbdə ülgüclə boğazını kəsib, şagirdlər daim Elinanı sıxışdırıb, lakin direktor Sevinc Abbasova bununla bağlı hər hansı addım atmayıb.

Direktor sadəcə E.Hacıyevanın anasına şifahi məlumat verməklə kifayətlənib.

İttihama görə, E.Hacıyeva özünü məktəbdən atandan sonra S.Abbasova təcili tibbi yardımı vaxtında çağırmayıb. Bununla da E.Hacıyevanın həyatını təhlükədə qoyub.

Elan olunmuş ittihamla Sevinc Abbasova özünü təqsirli bilməyib.

Məktəbdə intihar edən, 8-ci sinif şagirdi Elina Hacıyevanın ölümü ilə bağlı məktəbin direktoru Sevinc Abbasova cinayət məsuliyyətinə cəlb edilib.

S.Abbasova Cinayət Məcəlləsinin 143-cü (Təhlükədə qoyma) və 314.2-ci (Səhlənkarlıq; zərərçəkmiş şəxsin ölümünə səbəb olduqda) maddələri ilə ittiham irəli sürülüb.