İspaniya La Liqasında XXIII tura yekun vurulub.

Apasport.az saytının məlumatına görə, son gündə 5 görüş keçirilib.

Autsayderlərin duelində "Espanyol" "Malyorka"nı yeganə qol sayəsində üstələyərək xal hesabını bərabərləşdirib.

İspaniya Kral Kubokunda "Real" və "Barselona"nı mübarizədən kənarlaşdıran "Real Sosyedad"la "Atletik"in duelindən birincilər minimalhesablı qalibiyyətlə ayrılıblar.

"Osasuna"nın qonağı olan "Real" erkən qolla hesabda geri düşsə də, sonda böyükhesablı qələbə qazanaraq, liderliyini qoruyub.

"Sevilya" turnir cədvəlinin sonuncu pilləsində qərarlaşan "Selta" ilə Viqodakı matçdan məğlub dönüb. Əndəlüs təmsilçisi hesabı açmasına baxmayaraq, aktivinə 1 xal da yazdırmağı bacarmayıb.

Turun qapanış görüşündə "Barselona" "Betis"in qonağı olub. Bu oyun Kataloniya klubunun çalışdırıcısı Kike Setyenin sabiq komandasına qarşı iştirakı ilə əlamətdar olub. Kapitan Lionel Messinin 3 məhsuldar ötürmə verdiyi görüşdə "Barselona" əzmkar qələbəyə sevinib.

Ümumiyyətlə, gün bol qollu alınıb. Keçirilən 5 matçda qapılara 17 top vurulub.

İspaniya La Liqası
XXIII tur
9 fevral
"Espanyol" - "Malyorka" - 1:0
Raul de Tomas, 58
"Real Sosyedad" - "Atletik" - 2:1
Portu, 65; İsak, 83 - Villiams, 71
"Osasuna" - "Real" - 1:4
Unay Qarsiya, 14 - İsko, 33; Serxio Ramos, 38; Lukas, 84; Yoviç, 90+2
"Selta" - "Sevilya" - 2:1
Aspas, 78; Sisto, 90+1 - əl Nesiri, 23
"Betis" - "Barselona" - 2:3
Kanales, 6 (pen.); Fekir, 26 - de Yonq, 9; Buskets, 45+3; Lanqle, 72